KIPHUDOH CHOMCHA
Silchar munhi Assam sunga dinga khopi len, Guwahati bantah a ahi. Hiti tobang mun thupi khat ahi jehin, Central leh State Govt office tampi aum ban'a state thumin (Manipur, Mizoram leh Tripura) kiveina lampang'a akingainao khopi khat chu ahi. Hichegoh hilouvin, Assam University (Central University), National Institute of Technology, Medical College chuleh adang dang themjil na bulhingset umna munkhat jong ahi. Kuki chate jong avel a hin kho tampi achengin ahin khatle khat kihet toa tahsa hihen lhagao lam hijongleh hoplen tah'a kiloi khom na ana umkhapon ahi. Pakai kum 2009 hin Kuki chate natong holeh simlai ho phabep in tahsa hihen lhagao lam hijong leh kiloi khom na khat a umding deina jallin 23rd August 2009 nikho hin mun tinna kilung toh tah'a lhagaothua ikiloi khom nao Kuki Worship Service hi pom'a phudoh dia kihoulim na ana kinei chung changa hin, mipi tamjo nop na dungjui in KWS Silchar tin phudoh ahitai. Abannin, hou in kaina kisuh akinei loujehin North East India Baptist Bible College, Silchar ho kom'a tao na agakinei in, amahon jong ngailut na neitah in eisan peh un, Sivalik Park, Meherpur kiti munna a Conference Hall khat anei uchu eiphal pehun 2009 na pat tuni changeijin hiche munna hin kaikhom na kaneithei uve. Hou in mun eiphal peh na chung changuva, Pu Mang Johnson Simte, Lecturer, NEIBBC in hatah in pan alan ama chunga kipathu seijou lou ahi. Abanin, Pastor, Kamkhosiam Simte (Member, Governing Board, NEIBBC, Silchar) in jong ngailut na neitah in amun hi kaman thei chan chan uva kaman theidiovin jong phalna eipeh nachung chon uva mopohna jong nasatah in alan ama chunga jong kipa thu seijou lou ahi. Akipat tilla member 25-30 hichu tunin Pathen lungset jallin member 120 chunglam ahitan, student tampi leh natong tampi tukum jengin jong akibelap tai.
Pathen puihoi na jallin tukum 19th Aug 2012 (Sunday) nichun 3rd Foundation Day kamangun khovella sopi ule nao ho simthan mi 200 vallin Pathen thangvahna kin kaneikhom uve.Tupet'a doi leh tup chu KWS Vision 2020 kitoh a houin mun leh hou in agan nathei penna neitei ding lungtup ahin, hiche juidin Church Buiding Project jong kaneiuve.
Pathenin nam asem Kuki nampia dia kithodoh nathei dia muntinna kikithethang jong leh, nikhat leh kipum khat leh kilung toh tohtah a Ama ihou khom theinadio lampi eisempeh danun kamun tahsan jong katah sanne. Pakai lam veohitin machon uhite.
Pakai lhacha,
K Chongloi
Chairman
KWS, Silchar.
